Moskvada Mixail Talın xatirəsinə həsr edilmiş XXI kateqoriyalı beynəlxalq turnirin iştirakçıları təşkilatçıların onlar üçün nəzərdə tutduqları bir günlük istirahətdən sonra dünən beşinci turun görüşlərində qarşılaşmışlar. On məşhur qrossmeysterin mübarizə apardığı bu yarışda Azərbaycan şahmatının lideri Şəhriyar Məmmədyarov ilk dörd turda 2,5 xal toplamışdır.
Təmsilçimiz fasilə ərəfəsində erməni Levon Aronyanla heç-heçə oynamışdır. Dördüncü turun digər görüşlərində də rəqiblərdən heç biri öz üstünlüyünü sübuta yetirə bilməmişdir. Hikaru Nakamura (ABŞ) Vladimir Kramniklə (Rusiya), Boris Gelfand (İsrail) Aleksandr Qrişukla (Rusiya), Sergey Karyakin (Rusiya) Aleksey Şirovla (İspaniya), Van Hao (Çin) Pavel Elyanovla (Ukrayna) yarım xala razılaşmışlar.
Bu görüşlərdən sonra Məmmədyarov onun kimi 2,5 xal toplayan Karyakin, Qrişuk, Nakamura və Van Hao ilə ikinci-altıncı yerləri bölüşdürürdü. Onlar 3 xala malik Aronyandan yarım addım geri qalırdılar. Yeddinci-onuncu pillələrdə olan Kramnikin 2, Gelfandın 1,5, Elyanovla Şirovun 0,5 xalı var idi.
Dünən keçirilən beşinci turda Məmmədyarovu Qrişukla görüş gözləyirdi. Bu gün isə Azərbaycan şahmatçısı Elyanova qarşı oynayacaq.

Oqtay BAYRAMOV, "Xalq qəzeti"

{nl}