Avqustun 5-dən 21-dək Braziliyanın Rio-de-Janeyro şəhərində keçiriləcək XXXI Yay  Olimpiya Oyunlarına beş aydan da az vaxt qalır. Planetin  hər yerində səbirsizliklə gözlənilən dünya idmanının ən ali bayramında mümkün qədər  çox  iştirakçı ilə  mübarizə  aparmaq əzmində olan Azərbaycan idmançılarından birinci olaraq taekvondoçular lisenziya xarakterli yarışlarda qarşılarında duran  vəzifəni  müvəffəqiyyətlə yerinə yetirərək Olimpiadaya tam heyətlə getmək  hüququ  qazanmışlar.

Bu isə o deməkdir ki, Azərbaycan Olimpiya oyunlarında  ilk dəfə maksimum  miqdarda dayanq ustası ilə   təmsil olunacaq. Qaydalara görə Olimpiadada hər ölkənin  taekvondo  komandasında dörd iştirakçı -- iki kişi  və  iki qadın  çıxış  edə bilər. Rioya aparan yolda  Azərbaycana Olimpiya “biletlərini” təmin etmiş taekvondo  ustalarımızın bu günlər bütün səyləri  Olimpiada sınaqlarını tam hazırlıqla  qarşılamağa yönəlmişdir və bunun üçün  hər cür zəmin var.

Azərbaycan taekvondoçularının Rioya  lisenziyalarının  hesabını  Radik  İsayev (87 kq) açmışdır. Kişilərdən ibarət  komandamızın  liderlərindən  biri olan İsayev böyük uğurları ilə  fəxr edə bilər. Təkcə onu demək  kifayətdir ki, Radik  ötən il dünya  çempionu olmuş, tarixdə ilk dəfə keçirilən  Avropa Oyunlarının da  qızıl  medalını qazanmışdır.  Yarışdan-yarışa sürətlə  artan reytinqi onu bu göstərici üzrə  liderlər sırasına çıxardı və Olimpiadaya  vəsiqəni  təmin etdi.

R.İsayev dünya  reytinqində öz  çəki  dərəcəsində  liderlərdən  biridir.  Ümumdünya Taekvondo Federasiyasının martın əvvəllərində açıqladığı növbəti  reytinq  siyahısında o, özbəkistanlı Cəsur Baykuziyevdən sonra ikinci  mövqedədir.

Taekvondoçularımız növbəti  üç  lisenziyanı isə  bu ilin start ayında  qazanmışlar. Yanvarda İstanbulda keçirilən lisenziya xarakterli Avropa təsnifat turnirində Olimpiya vəsiqələrini finalçılar özlərinə  təmin  edirdilər. Azərbaycan  taekvondoçuları Milad Beiqi Hərçəqani (80 kq), Fəridə  Əzizova (67 kq) və Patimat Abakarova (49 kq) finala  vəsiqə  qazanmaqla  kifayətlənməyib,  həlledici  görüşdə də  rəqiblərindən  güclü olmaqla,  lisenziya ilə yanaşı birinci yerin  sevincini yaşamışlar.

Fərəhlə yada sala bilərik ki, Rioya Olimpiya “biletlərini” Türkiyədə sifariş etmiş üç  taekvondoçumuzdan heç biri qardaş ölkədə bir görüşdə belə  uduzmayıb. Əksinə, Hərçəqani bütün  rəqiblərindən açıq-aşkar güclü olduğunu latviyalı Yanis Kauneni 16:0, erməni Arman Yeremyanı 11:1, yarımfinalda türkiyəli  Yunus  Sarını 10:1, finalda isə  polyak  Peter Lazinsikini 14:2 hesabı ilə  məğlubiyyətə  uğratmaqla inamla sübuta yetirmişdir.

İkinci dəfə Olimpiya oyunlarının iştirakçısı olacaq Fəridə Əzizovanın fəxri  kürsünün  zirvəsinə yolu Makedoniya, Ukrayna, Sloveniya  və Almaniya idmançıları  üzərində  qələbələrdən keçmiş, Patimat Abakarova da öz  növbəsində Hollandiya, Yunanıstan, Ukrayna və  Serbiya  təmsilçiləri ilə  görüşlərdə  maksimum nəticəyə nail olmuşdur.

Fəridənin bu yaxınlarda,  fevralın son günlərində Birləşmiş Ərəb Əmirliklərinin Fujayra şəhərində keçirilmiş beynəlxalq  turnirin qalibi olduğunu,  dünya  reytinq cədvəlində səkkizinci  pillədə  irəlilədiyini  də xatırlamaq yerinə düşər.

Taekvondo ustalarımızın son uğurları haqqında  danışarkən kişilərdən ibarət komandanın ötən  ilin dekabrında  Mexikoda keçirilmiş Dünya kuboku turnirində tarixi  nailiyyətinin  üstündən sükutla keçmək olmaz. Meksika  paytaxtında kubok uğrunda ən  güclü  taekvondo ölkələrinin  təmsilçiləri  mübarizə  aparmışlar  və  belə bir  mötəbər yarışda birinci olmaq  qürurverici  nailiyyətdir. İran, Koreya, Belçika, Özbəkistan və digər ölkələrin yığmaları ilə kəskin  rəqabətdə zirvəni  fəth etmək  heç də hər komandanın işi deyil.

Uzaq Mexikodan Dünya kubokunun Bakıya  gətirilməsi  milli komandamızın üzvləri Radik İsayev, Milad Beiqi Hərçəqani, Ayxan Tağızadə, Məhəmməd Məmmədov, Sina Bəhrami, Səid Quliyev və onların baş məşqçisi Rza Mehmandostun gərgin əməyinin,  məqsədyönlü təlim-məşq  prosesinin bəhrəsidir. Deməli, Rioda XXXI Yay  Olimpiya Oyunlarında uğurla çıxış etmək və nəhayət, olimpiadalarda  Azərbaycan  taekvondoçularının  medallarının hesabını  açmaq  perspektivlərimiz  kifayət qədər böyükdür.

Oqtay BAYRAMOV,
“Xalq  qəzeti”