Futbol üzrə Azərbaycan kuboku yarışlarında dörddəbir final mərhələsinin cavab görüşləri də keçirilmiş və yarımfinalda fəxri mükafat uğrunda mübarizəni  davam etdirəcək komandalar  məlum olmuşdur.

Bu hüququ  Ağdamın “Qarabağ”, Bakının “İnter”, “Neftçi”  klubları  və “Qəbələ” futbolçuları  qazanmışlar. Ağdam komandası dörddəbir finalda “Sumqayıt” üzərində  üstünlüyünü iki qələbə ilə sübuta  yetirmiş (2:0 və 4:1), “Qəbələ” də hər iki oyunda “Zirə”dən  güclü olmuş (2:1, 5:1), “İnter” “Rəvan” ilə ilk görüşdəki məğlubiyyətin (1:2) əvəzini cavab matçında üç  cavabsız qolla  çıxmış (3:0), “Neftçi” isə iki oyunun ümumi yekununda “Xəzər-Lənkəran”ı mübarizədən kənarlaşdırmışdır (səfərdə 2:3-dən sonra evdə 2:0).

Yarımfinal görüşləri aprelin 27-də və mayın 4-də keçiriləcəkdir. Finalın  astanasında “İnter”lə  “Qarabağ”, “Neftçi” ilə “Qəbələ” üz-üzə  gələcəklər.

Oqtay BAYRAMOV,
“Xalq qəzeti”