Bir həftə ərzində voleybol həvəskarlarının Bakı İdman Sarayında maraqla izlədikləri qadın komandaları arasında beynəlxalq turnirin baş mükafatını Azərbaycan paytaxtının "Azərreyl" klubu qazanmışdır. Bakılılar yarışın sonuncu günü həmyerliləri "Rabitə" voleybolçularına məğlub olsalar da (0:3) udulan və uduzulan hissələrin fərqinə görə turnirin qalibi olmuşlar. Komanda finişə 9 xalla çatmışdır.
Beşinci turun digər iki oyununda "Uraloçka" (Rusiya) "Qalatasaray"dan (Türkiyə) güclü olmuş - 3:1, "Lokomotiv" (Azərbaycan) isə "Zareçye Odintsovo"ya (Rusiya) uduzmuşdur - 0:3.
Nəticədə, ikinci yeri "Rabitə" kollektivi tutmuşdur. Bu komanda da 9 xal toplayaraq öz növbəsində hissələrin fərqinə görə üçüncü mükafatçı "Uraloçka" klubunu qabaqlamışdır.
Turnirin ən yaxşı voleybolçusu üçün təsis edilmiş mükafata "Rabitə"nin lideri Natalya Məmmədova layiq görülmüşdür.

Oqtay BAYRAMOV, "Xalq qəzeti"