Qrossmeyster Şəhriyar Məmmədyarov Moskvada keçirilən və səkkizinci dünya çempionu Mixail Talın xatirəsinə həsr edilən beynəlxalq turnirdə qələbələrinin hesabını açmışdır. Azərbaycan şahmatçısı Hikaru Nakamura (ABŞ) və Sergey Karyakinə (Rusiya) qarşı ağlarla oynadığı görüşlərin hər ikisində heç-heçə ilə kifayətləndikdən sonra üçüncü turda qara fiqurlarla ispaniyalı Aleksey Şirova qalib gəlmişdir. Gərgin mübarizə şəraitində davam edən görüşün taleyi 71-ci gedişdə həll olunmuşdur.
Turun qalan oyunlarında Pavel Elyanov (Ukrayna) Vladimir Kramnikə (Rusiya) uduzmuş, Levon Aronyan (Ermənistan) Boris Gelfanda (İsrail) qalib gəlmiş, Karyakin və Aleksandr Qrişuk (Rusiya) isə müvafiq surətdə Nakamura və Van Hao (Çin) ilə heç-heçəyə razılaşmışlar.
Üç turdan sonra turnir cədvəlinin birinci pilləsində olan Aronyanın 2,5 xalı vardır. İki-altıncı yerləri bölüşdürən Məmmədyarov, Karyakin, Qrişuk, Nakamura və Van Hao 2 xal toplamışlar.
Dünən keçirilən dördüncü turda Azərbaycan şahmatçısı ağlarla Aronyana qarşı oynamışdır. Bu gün isə turnirdə istirahət günüdür.

Oqtay BAYRAMOV, "Xalq qəzeti"