Ötən bazar günü Çex Respublikasının paytaxtı Praqada başa çatmış cüdo üzrə Avropa kuboku turnirinin bir qızıl və bir bürünc medalı azərbaycanlı tatami ustalarına təqdim olunmuşdur.

Məmmədəli Mehdiyev (90 kq) xüsusilə yaxşı hazırlıq və əzmkarlıq nümayiş etdirmişdir. Hollandiya, Finlandiya, Latviya idmançıları üzərində qələbələrdən sonra yarımfinalda polşalı Patrik Çexomski, finalda ispan David Ruis ilə görüşlərdə müvəffəqiyyət Mehdiyevi fəxri kürsünün zirvəsinə yüksəltmişdir.

Bürünc mükafatı isə 100 kq-dan yuxarı çəki dərəcəsində çıxış edən Uşanqi Kokauri qazanmışdır. Bu təmsilçimiz üçüncü yer uğrunda görüşdə ukraynalı Andrey Kolesnikə qalib gəlmişdir.

Praqa turnirinin medalları həm onların sahiblərinə öz reytinqlərini artırmaq imkanı  vermiş, həm də Azərbaycan yığmasını komanda hesabında ikinci yerə çıxarmışdır.

Rapiddə baş rolu Məmmədyarov oynadı

Çin Xalq Respublikasının Huayan şəhərində keçirilən Ümumdünya İntellektual Oyunlarının sürətli şahmat yarışlarında (rapid, blits, bask şahmatı – eyni vaxtda həm ağlar, həm də qaralarla oyun) birinci olaraq rapid turnirinə yekun vurulmuşdur. On altı rəqibin mübarizəsində baş rolu Şəhriyar Məmmədyarov oynamışdır.

Azərbaycanlı qrossmeyster 7 mümkün xaldan 5 xal toplayaraq ukraynalı Ruslan Ponomaryovla eyni nəticə göstərmişdir. Hər iki qalibdə əlavə göstəricilər də eyni olduğundan qızıl medalın taleyi onlar arasında keçirilən tay-brekdə həll olunmuşdur. Bu görüşdə Məmmədyarov qələbə qazanmışdır. Qızıl mükafatçının həmvətəni Rauf Məmmədov isə 3,5 xalla səkkizinci olmuşdur.

Burada xatırlatmaq yerinə düşər ki, Şəhriyar bir neçə il əvvəl Rusiyanın Xantı-Mansiysk şəhərində keçirilmiş rapid üzrə dünya çempionatında da qızıl medal qazanmışdı.

Ümumdünya İntellektual Oyunlarının rapid  yarışında qalib və mükafatçılar müəyyənləşdikdən sonra blits turnirinə start verilmişdir. Dünən başa çatan 30 turdan ibarət bu yarışın da qalibi Azərbaycan şahmatçısı olmuşdur. Rauf Məmmədov 19,5 xal toplayaraq qızıl medal qazanmış və Şəhriyar Məmmədyarovun rapiddəki nailiyyətini təkrar etmişdir.

Oqtay BAYRAMOV,
“Xalq qəzeti”