Serbiyanın paytaxtı Belqradda futzal üzrə dünya  çempionatının pley-off mərhələsinin püşkatma mərasimi keçirilmiş və Azərbaycan komandasının bəxtinə Hollandiya yığması düşmüşdür. Əgər futzal ustalarımız iki oyunun yekununda mundiala vəsiqənin taleyini öz xeyirlərinə həll edə bilsələr, Azərbaycan millisi tarixində ilk dəfə dünya çempionatının final mərhələsində iştirak etmək hüququ qazanacaq.

Pley-off görüşlərindən birincisi martın 22-də hollandların meydanında keçiriləcək, cavab matçı isə aprelin 12-də Bakıda oynanılacaq.

Dünya çempionatının pley-off mərhələsində Avropa ölkələri komandalarının iştirakı ilə həmçinin bu görüşlər keçiriləcəkdir: Sloveniya-İspaniya, Slovakiya-Ukrayna, Polşa-Qazaxıstan, Serbiya-Portuqaliya, Belarus-Rusiya, Macarıstan-İtaliya.

Dünya çempionatının final mərhələsi bu il sentyabrın 14-dən oktyabrın 2-dək Kolumbiyada keçiriləcək və medallar uğrunda 24 komanda mübarizə aparacaq.

Şahmatçımız ənənəvi turnirdə

Dünən Fransada ənənəvi “Kappel-la-Qrand” beynəlxalq şahmat turnirinə start verilmişdir. Sayca 32-ci dəfə keçirilən bu yarışın iştirakçıları arasında Azərbaycan şahmat məktəbinin yetirməsi Nərmin Xələfova da vardır.

Turnirdə mübarizəyə qoşulan rəqiblərin 70-dən çoxu qrossmeysterdir. Reytinqə görə onların siyahısına ABŞ təmsilçisi Qata Kamski başçılıq edir. İsveçrə sistemi üzrə keçirilən turnirin qalib və mükafatçıları doqquz turun yekununda müəyyənləşəcək.

Oqtay BAYRAMOV,
“Xalq qəzeti”