Azərbaycanın futzal ustaları Serbiyanın paytaxtı Belqradda keçirilən Avropa çempionatı final mərhələsinin ikinci turunda Çexiya komandası ilə gərgin oyunda çətin, amma çox mühüm qələbə qazanmışlar.

“Arena Belqrad”da ilk görüşdə Avropa çempionu İtaliyaya 0:3 hesabı ilə uduzan komandamız pley-off mərhələsinə vəsiqə uğrunda mübarizədə Çexiya ilə prinsipial matçda rəqibini bir top üstünlüklə məğlubiyyətə uğratmışdır. Sloveniya və avstriyalı hakimlərin idarə etdikləri və qollarla zəngin oyunda Azərbaycan komandasının xeyrinə 6:5 hesabı qeydə alınmışdır.

İndi “D” qrupunda ilkin mərhələnin başa çatmasına bir görüş qalır. Bu günə təyin edilmiş İtaliya-Çexiya qarşılaşmasında italyanların qələbəsi və ya heç-heçə təqdirində yığmamız dörddəbir finala çıxıb Avropanın ən güclü səkkiz komandası sırasında yoluna davam edəcək.

Oqtay BAYRAMOV,
“Xalq qəzeti”