Serbiyanın paytaxtı Belqradda Serbiya–Sloveniya (“A” qrupu) və İspaniya–Macarıstan (“B” qrupu) görüşləri ilə futzal üzrə Avropa çempionatının final mərhələsinə start verilmişdir. Bu oyunlarda serblər 5:1, ispanlar isə 5:2 hesabı ilə qələbə qazanmışlar.

Azərbaycan millisi İtaliya və Çexiya yığmaları ilə birlikdə “D” qrupunda çıxış edir. Futzal ustalarımız ilk görüşü dünən Bakı vaxtı ilə gecəyarısı Avropa çempionları italyanlara qarşı keçirmişlər. Fevralın 5-də isə komandamızı çexlərlə oyun gözləyir.

Çempionat iştirakçıları hərəsində üç komanda olmaqla dörd qrupa bölünmüşlər. Qruplarda birinci-ikinci yerlərin sahibləri dörddəbir finalda Avropa çempionatının medalları uğrunda mübarizəni davam etdirəcəklər. Bu mərhələnin görüşləri fevralın 8-9-da oynanılacaq.

Oqtay BAYRAMOV,
“Xalq qəzeti”