Şəhriyar Məmmədyarov paytaxt Doha şəhərində artıq finişin astanasında olan “Qatar Masters Open” beynəlxalq şahmat turnirinin ötən şənbə və bazar günlərinə təsadüf etmiş altıncı və yeddinci turlarında daha 1,5 xal qazanaraq turnir cədvəlinin zirvəsinə yüksəlmişdir.

Azərbaycanlı qrossmeyster əvvəkli turlarda olduğu kimi, yenə də qaralarla heç-heçəyə razılaşmış, ağ fiqurlarla rəqibini çıxılmaz vəziyyətə salmışdır. “Dinc” nəticə rusiyalı keçmiş dünya çempionu Vladimir Kramniklə görüşdə qeydə alınmışdır. Ertəsi gün isə Şəhriyar ağlarla gərgin mübarizədən sonra 85-ci gedişdə Surya Qanqulini (Hindistan) məğlubiyyətə uğratmışdır.

Nəticədə altı raunddan sonra vahid lider olmuş norveçli dünya çempionu Maqnus Karlsenin yeddinci turda hollandiyalı Aniş Giriyə qarşı görüşdə heç-heçə ilə kifayətlənməsindən istifadə edən Məmmədyarov yarışın  başa çatmasına iki tur qalmış 5,5 xalla turnir cədvəlində birinci mövqedə qərar  turmuşdur. Karlsen və rusiyalı Sənan Syugirov da Şəhriyarla eyni nəticə göstərmişlər, lakin təmsilçimiz əlavə göstəricilərə görə onları qabaqlayır. Daha 16 iştirakçı isə liderlər üçlüyündən yarım xal geri qalır. Göründüyü kimi, mükafatlar uğrunda mübarizədə gərginlik son həddə çatmışdır.

Dünən axşam keçirilən səkkizinci turda Məmmədyarov Karlsenlə görüşmüşdür.

Oqtay BAYRAMOV,
“Xalq qəzeti”