Azərbaycan şahmatçısı Şəhriyar Məmmədyarov Qətərin paytaxtı Doha şəhərində keçirilən mötəbər beynəlxalq turnirə qələbə ilə başlamışdır. Qrossmeysterimiz ilk görüşdə ikiqat Avropa çempionu ukraynalı Natalya Jukova ilə qarşılaşmış və 49-cu gedişdə rəqibinin məğlubiyyətlə barışmağa məcbur etmişdir.

İsveçrə sistemi üzrə keçirilib doqquz turdan ibarət olan bu yarışda 132 iştirakçı, o cümlədən dünya çempionu norveçli Maqnus Karlsen başda olmaqla 89 qrossmeyster mübarizə aparır. Start turunun ən gözlənilməz nəticələrindən biri Karlsenin gürcüstanlı Nino Batsiaşviliyə qarşı ağlarla oynadığı görüşdə heç-heçə ilə kifayətlənməsi olmuşdur.

Dünən Bakı vaxtı ilə saat 17-də başlanan ikinci turda Məmmədyarov sinqapurlu Jonq Janq ilə görüşmüşdür.

Oqtay BAYRAMOV,
“Xalq qəzeti”