“Sumqayıt”-"Rəvan"-3:3, “Qarabağ”-"Qəbələ"-1:1,"Kəpəz"-"Neftçi"-1:1, AZAL-"Zirə"-1:0, “İnter”-"Xəzər"—Lənkəran"—2:0.

Topaz Premyer Liqasının 18-ci  turuna təsadüf etmiş bu oyunlarla Azərbaycan milli çempionatının birinci yarısı arxada qalmış və rəqiblər qış fasiləsinə çıxmışlar.

Təbii ki, müxtəlif əhval-ruhiyyə ilə. Turnir cədvəlinin zirvəsimdə dayanmağa layiq olduğunu bir daha inamla sübuta yetirmiş “Qarabağ” (38 xal), ikinci-üçüncü pillələrdə qərar tutan “İnter” (30) və “Zirə” (29) dörd dövrədən ibarət çempionatın ilk iki dövrəsində göstərdikləri nəticələrdən razı qala bilərlər. Daha bir neçə klubun, xüsusən də “Qəbələ” (28), “Kəpəz” (26) və “Neftçi”nin (24) qış fasiləsindən sonra gümüş və bürünc medallar uğrunda mübarizədə fəal rol oynayacaqları şübhə doğurmur. Cədvəldə sonrakı dörd yeri tutan AZAL (22), “Sumqayıt” (18), “Xəzər-Lənkəran” və “Rəvan” (hərəyə 12 xal) çətin turnir məsafəsinin ikinci yarısında öz xal ehtiyatlarını mümkün qədər artırmaq qayğısına qalmalı olacaqlar.

Təqvimdə üçüncü dövrənin ilk oyunları 2016-cı il yanvarın 30-na təyin edilmişdir. Həmin gün AZAL-"Qarabağ", “Qəbələ”-"Kəpəz" və “Neftçi”-"Sumqayıt" görüşləri keçiriləcəkdir. Ertəsi gün isə “Zirə” futbolçuları “İnter”lə, “Xəzər-Lənkəran” “Rəvan” ilə qarşılaşacaqlar.

Oqtay BAYRAMOV,
“Xalq qəzeti”