Qış fasiləsi ərəfəsində olan Topaz Premyer Liqasında 18-ci  tura bu  günə təyin edilmiş “Sumqayıt”-"Rəvan" və “Qarabağ”-"Qəbələ" görüşləri ilə start veriləcəkdir.  Turun son üç oyunu isə sabah keçiriləcəkdir: AZAL-"Zirə", “Kəpəz”-"Neftçi", “İnter”-"Xəzər-Lənkəran". Bununla da rəqiblər dörd dövrədən ibarət milli çempionatımızın birinci yarısına yekun vuracaqlar.

On yeddinci turda isə qonaq komandalar rəqib meydanında özlərini “doğma divarlar” arasındakı kimi hiss etmişlər. Onlar turun beş görüşünün üçündən hərəyə 3 xalla ayrılmışlar (“Rəvan”-"İnter"-0:2, “Xəzər-Lənkəran”-"Kəpəz"-0:1, “Neftçi”-AZAL-0:1). Qalan iki oyunda “Zirə”nin növbəti qələbəsi (bu dəfə “Qəbələ” üzərində—1:0) və “Sumqayıt”ın lider “Qarabağ”ın meydanında heç-heçəsi (2:2) diqqəti cəlb etmişdir.

Otən turda qeydə alınmış bu nəticələrdən sonra “Qarabağ”ı (37 xal) turnir cədvəlində ikinci mövqedə olan “Zirə”dən (29) səkkiz xallıq məsafə ayırır. Üçüncü-dördüncü pillələrdə qərar tutan “İnter” və “Qəbələ” hərəyə 27 xal toplamışlar. Cədvəldə birinci beşliyi 25 xala malik “Kəpəz” tamamlayır. Sonrakı beş yeri isə “Neftçi” (23 xal),  AZAL (19), “Sumqayıt” (17), “Xəzər-Lənkəran” (12) və “Rəvan” (11) tuturlar. Görək qarşıdakı tur cədvəldə nə kimi dəyişikliklər edəcək, rəqiblər qış fasiləsinə necə əhval-ruhiyyə ilə çıxacaqlar.

Oqtay BAYRAMOV,
“Xalq qəzeti”