Bakının “Azəryol” klubu qadın komandaları arasında Avropa Voleybol Konfederasiyası kuboku yarışlarının dörddəbir  final mərhələsində yoluna davam edəcək.

Azərbaycan voleybolçuları bu hüququ səkkizdəbir finalda Finlandiyanın “Salo” komandası üzərində iki qələbə ilə qazanmışlar. Finlandiyada ilk oyunda meydan sahiblərinə elə bir çətinlik çəkmədən 3:0 hesabı ilə qalib gələn “Azəryol” Bakıda cavab görüşündə də pərəstişkarlarını  sevindirmişdir. Lakin bu dəfə mübarizə daha gərgin keçmiş və komandamız oyunun taleyini yalnız beşinci hissədə öz xeyrinə həll edə bilmişdir-3:2.

İndi qarşıda dörddəbir final görüşləri durur. Bu mərhələdə rəqibimiz Polşanın “Muşina” klubu olacaq. Polyaklar səkkizdəbir finalda iki oyunun yekununda Sloveniyanın Maribor şəhərinin “Nova Branik” komandasından güclü olmuşlar.

Oqtay BAYRAMOV,
“Xalq qəzeti”