Azərbaycanın futzal üzrə milli komandası Xorvatiyanın Osiyek şəhərində 2016-cı il dünya çempionatının seçmə mərhələsini 2-ci qrupun qalibi kimi başa vurmuşdur.

İlk iki görüşdə İsveç və Belarus yığmaları üzərində müvafiq surətdə 8:2 və 7:2 hesabı ilə qələbə qazanan futzal ustalarımız finişdə yarış sahibləri xorvatlarla heç-heçə oynamış (4:4) və 7 xalla turnirin qalibi olmuşlar.

Yekun cədvəlində ikinci yeri tutan Belarus idmançıları 4 xal toplamışlar. Nəticədə Azərbaycan və Belarus komandaları pley-off görüşlərinə vəsiqə qazanmışlar.

Avropanın digər altı qrupundan isə növbəti mərhələyə Ukrayna, Macarıstan, Rusiya, Serbiya, İspaniya, Hollandiya, Portuqaliya, Polşa, Qazaxıstan, Sloveniya, İtaliya və Slovakiya futzalçıları çıxmışlar.

Pley-off görüşlərində (22 mart və 12 aprel 2016-cı il) qarşılaşacaq rəqiblər fevralın 12-də Serbiyanın paytaxtı Belqradda püşkatma mərasimində müəyyənləşəcəkdir. Bu oyunlarda seçmə qrupların qalibləri ikinci yerlərin sahibləri ilə görüşəcəklər. Bu isə o deməkdir ki, Azərbaycan komandasının rəqibi digər altı qrupda finişə ikinci çatmış Macarıstan, Serbiya, Hollandiya, Sloveniya, Polşa və Slovakiya yığmalarından biri olacaq.

Bu mərhələnin qalibləri, Avropanın yeddi ölkəsinin təmsilçiləri gələn ilin sentyabr-oktyabr aylarında Kolumbiyada keçiriləcək dünya çempionatının final turnirində oynamaq hüququ qazancaqlar. Həlledici mərhələdə həmçinin digər qitələrdən daha 17 komanda, cəmi 24 kollektiv mübarizə aparacaq.

Oqtay BAYRAMOV,
“Xalq qəzeti”