Azərbaycanın futzal üzrə milli komandası Xorvatiyanın Osiyek  şəhərində keçirilən 2016-cı il dünya çempionatının seçmə mərhələsində (2-ci qrup) rəqiblərini bir-birinin ardınca ağır məğlubiyyətlə barışmağa məcbur edir.

Turnirin açılış günü İsveç yığmasına 8:2 hesabı ilə qalib gələn futzal ustalarımız ikinci turda Belarus idmançıları ilə görüşdə də məhsuldar oyun nümayiş etdirmişlər. Bu dəfə  komandamız öz qapısından buraxdığı iki topun əvəzini yeddi qolla çıxmışdır-7:2.

İkinci turun digər görüşündə meydan sahibləri Xorvatiya futzalçıları isveçli rəqibləri üzərində 5:1 hesabı ilə qələbə qazanmışlar.

Finişə bir tur qalmış qrupun turnir cədvəlinə 6 xala malik Azərbaycan komandası başçılıq edir. İkinci-üçüncü yerləri tutan Belarus və Xorvatiya hərəyə 3 xal toplamışlar. İsveçlilər isə hər iki oyunda uduzmuşlar.

Bu günə təyin edilmiş üçüncü turda Azərbaycan-Xorvatiya və İsveç-Belarus görüşləri keçiriləcəkdir.

Xatırladaq ki, Avropa komandaları gələn ilin sentyabr-oktyabr aylarında Kolumbiyada təşkil olunacaq dünya çempionatının final turnirində çıxış etmək hüququ uğrunda yeddi qrupda mübarizə aparırlar. Hər qrupdan ən yaxşı iki komanda pley-off görüşlərinə vəsiqə qazanacaq və burada cütlərin qalibləri Kolumbiyaya “biletləri” özlərinə təmin edəcəklər.

Oqtay BAYRAMOV,
“Xalq qəzeti”