Təəssüf  ki,  Azərbaycanın  futbol  ictimaiyyətinin  UEFA  Avropa  Liqası  həyəcanları  bitdi.  Hərçənd  Ağdamın “Qarabağ”  komandası  finişdə  Brüsseldə Belçikanın “Anderlext”  klubu ilə  çox  mühüm  oyunda  hesabı  açıb pley-off  mərhələsinə  vəsiqə  qazanmaq məqsədinə  bir qədər  yaxınlaşmışdı.

Ancaq  birinci  hissənin  ortalarında  Dani Kintananın vurduğu  qolun  sevincini  çox  yaşaya  bilmədik.  Tezliklə  bu  topa  iki  qolla  cavab  verən meydan  sahibləri oyunun  sonunadək  hesabda  üstünlüklərini  qoruyub  saxladılar.

Nəticədə 2:1  hesabı ilə  qələbə  qazanıb  xallarının sayını 10-a çatdıran “Anderlext”  həmin  axşam  Fransanın “Monako”  komandasını  məğlubiyyətə  uğradan (4:1) İngiltərənin “Tottenhem”  klubu ilə birlikdə “J”  qrupundan növbəti  mərhələyə  vəsiqə  qazandı.

“C” qrupundakı  təmsilçimiz  “Qəbələ”nin  isə “doğma  divarlar”  arasında “Krasnodar”a böyük  hesabla  uduzması (0:3) bir qədər  gözlənilməz oldu. “Borussiya” (Dortmund, Almaniya) — PAOK (Yunanıstan)  görüşündə  qələbəyə  yunanlar  sevinmişlər — 1:0. Bu  qrupdan pley-off  mərhələsinə  Rusiya  və  Almaniya klubları  çıxmışlar.

Oqtay BAYRAMOV,
“Xalq qəzeti”