Futzal üzrə  milli  komandamız Xorvatiyanın Osiek  şəhərində  keçirilən  dünya  çempionatının  seçmə  mərhələsinə  gurultulu  qələbə ilə başlamışdır. Azərbaycan  yığması  ilk görüşdə İsveç  komandasını 8:2  hesabı ilə  məğlubiyyətə  uğratmışdır.

Oyunun  taleyi  artıq birinci hissədə  həll olunmuşdur. Futzal ustalarımız  fasiləyədək rəqiblərinin  qapısından beş  cavabsız  top  keçirmişlər. İkinci  hissədə  hesabda  üstünlük bir  qədər  də  artmışdır.

Bu  komandaların  daxil olduğu 2-ci  qrupun  digər oyununda da böyük hesab  qeydə alınmışdır: Belarus — Xorvatiya — 7:4.

Dünən axşam keçirilən  ikinci  turda Azərbaycan millisi Belarus yığması ilə görüşmüşdür.

Finlandiyada  qələbə

Bakının qadınlardan ibarət “Azəryol” komandası Avropa Voleybol Konfederasiyasının kuboku  yarışlarının səkkizdəbir  final mərhələsinə Finlandiyada  qələbə ilə start vermişdir.

Voleybolçularımız  səfərdə  çıxış  etmələrinə baxmayaraq, yerli “Salo”  klubuna çətinlik  çəkmədən  qalib  gəlmişlər — 3:0. Rəqib  meydanında  belə  inamlı  qələbədən sonra “Azəryol”un Bakıda  cavab görüşündən  də  qalib ayrılıb dörddəbir finala  çıxacağı  elə bir şübhə  doğurmur.

Oqtay BAYRAMOV,
“Xalq qəzeti”