İstedadlı taekvondo ustası Radik İsayevin (80 kq-dan yuxarı çəki dərəcəsi) qazandığı bu lisenziya həm də Azərbaycan idmançılarının həmin növdə Rio-de-Janeyro Olimpiadası üçün ölkəmizə təmin etdikəri ilk vəsiqədir.

Milli Taekvondo Federasiyası saytının bu  barədə fərəhlə yaydığı məlumatda bildirildiyi kimi, R.İsayev XXXI Yay Olimpiya Oyunlarına lisenziyanı “Qran-pri” turnirlərində topladığı xallar sayəsində qazanmışdır.

Həqiqətən, olimpiyaqabağı 2015-ci il lisenziyalarımızın sayını 28-ə çatdıran Azərbaycan taekvondoçularının lideri üçün uğurlu olmuşdur. Bu il reytinq xarakterli bir sıra mötəbər turnirlərdə fəxri kürsüyə yüksəlmiş, Rusiyanın Çelyabinsk şəhərində dünya çempionatının qızıl medalını qazanmış, iyunda doğma Bakıda keçirilən tarixdə ilk Avropa Oyunlarının çempionu kimi təbrikləri qəbul etmiş Radik İsayev ilin finişində Olimpiya oyunlarına lisenziyanın da sevincini yaşamışdır. İndi qalır Rio-2016-ya daha səylə hazırlaşıb gələn ilin avqust ayında Braziliya səması altında da parlamaq.

Bakıda İştvan Kovaç,
Brüsseldə Slavko Vinçiç

UEFA Avropa Liqası yarışlarında qrup mərhələsinə yekun vurmaq vaxtıdır. Bu gün turnirdəki Azərbaycan təmsilçiləri sonuncu, altıncı oyunlarını keçirəcəklər.

Birinci olaraq “Qəbələ” futbolçuları “Krasnodar”ı qəbul edəcəklər. Əgər rusiyalı qonaqlarımız “C” qrupunun iki qalibindən biri kimi pley-off mərhələsinə vəsiqəni özlərinə təmin etmişlərsə, ilk dəfə belə məsul yarışda iştirak edən Azərbaycan klubu vida matçında pərəstişkarlarını qələbə ilə sevindirmək əzmindədir.

Saat 22-də “Bakcell Arena”da başlanacaq “Qəbələ”-"Krasnodar" görüşünü başda İştvan Kovaç olmaqla rumıniyalı hakimlər briqadası idarə edəcəkdir.

Bu oyun başa çatan kimi, saat 00:05-də Brüsseldə “J” qrupunda çıxış edən “Anderlext” və “Qarabağ” komandalarının görüşünə start veriləcəkdir.  UEFA istər belçikalılar, istərsə də Azərbaycan futbolçuları üçün son dərəcə mühüm əhəmiyyət kəsb edən oyunun hakimliyini Sloveniya Futbol Federasiyasının nümayəndələri, baş hakim Slavko Vinçiç və onun həmvətənlərinə həvalə etmişdir.

Ölkə çempionumuz Ağdam klubunun hələ pley-off mərhələsinə adlamaq şansı var. Komandanın bu məqsəd uğrunda son anadək yorulmadan var qüvvə ilə mübarizə aparacağı da şübhəsizdir.

Futzal  sınaqları

Azərbaycanın futzal üzrə  milli komandası bu günlər Xorvatiyanın  qonağıdır. Osiek  şəhərində start  ərəfəsində olan 2016-cı il  dünya çempionatının  seçmə  mərhələsində yığmamızın  rəqibləri yarış sahibləri  xorvatlar, habelə İsveç  və  Belarus  komandalarıdır (2-ci  qrup).

Turnirə bu  axşam  start veriləcəkdir. Futzal  ustalarımız ilk oyunda  İsveç  idmançıları ilə “münasibətləri  aydınlaşdıracaq”,  sabah keçiriləcək ikinci turda Belarus yığmasına  qalib gəlməyə  çalışacaqlar.  Bir  günlük istirahətdən sonra,  dekabrın 13-də isə  rəqibimiz Xorvatiya  komandası olacaq.

Qrupun ən yaxşı  iki komandası  növbəti  mərhələdə  pley-off  görüşlərində  mübarizəni  davam etdirəcək.  Bu oyunların  qalibləri  gələn ilin payızında Kolumbiyada  təşkil olunacaq  dünya  çempionatının  final turnirinə  vəsiqə  qazanacaqlar.  Həlledici   mərhələdə  Avropanı yeddi ölkə – pley-off  sınaqlarının yeddi  qalibi  təmsil edəcək.

Orucov  və Qasımov  birinci mövqedə

Beynəlxaoq Cüdo Federasiyası  dekabrın 6-da  Tokioda  başa çatmış “Böyük  dəbilqə”  turnirindən sonra  növbəti  reytinq  cədvəlini  açıqlamışdır.

Azərbaycanlı  tatami  ustaları  Rüstəm Orucov (73 kq-dək)  və Yaponiya  paytaxtında  bürünc  medal qazanmış Elmar Qasımov (100 kq-dək) əvvəlkitək öz  çəki  dərəcələrində  birinci  mövqedədirlər.

Milli  komandamızın digər  üzvlərindən  60 kq-dək  çəki  dərəcəsində çıxış  edən Orxan Səfərov siyahıda 4-cü, İlqar Müşkiyev 17-ci,  66 kq-dək  çəkidə  Nicat Şıxəlizadə  6-cı, Elxan Məmmədov (100 kq-dək) isə 19-cu yerdədir.

Oqtay BAYRAMOV,
“Xalq qəzeti”