Topaz Premyer Liqasında 15-ci turun birinci oyun günü keçirilən hər üç görüş onların nəticələrindən də göründüyü kimi gərgin mübarizə şəraitində davam etmişdir. Çempionluq yolunda inamla irəliləyən “Qarabağ”ın “İnter” üzərində qələbəsi, “Qəbələ”nin səfərdə “Xəzər-Lənkəran” ilə görüşdə müvəffəqiyyəti bir top üstünlüklə ifadə olunmuş (hər iki görüşdə hakimlər 1:0 hesabı qeydə almışlar), “Neftçi” ilə “Zirə” isə bir-birinin müqavimətini qıra bilməyərək hərəyə 1 xalla kifayətlənmişlər-1:1.

Bu oyunlardan sonra 35 xala malik Ağdam klubunun vahid lider mövqeyi əvvəlkitək möhkəmdir. Turnir cədvəlində ikinci pilləyə qayıdan “Qəbələ” 27, üçüncü yeri tutan “Zirə” 25 xala malikdir. Liderlər üçlüyünün ən yaxın izləyicisi “İnter” 24 xal toplamışdır.

On  beşinci tura dünən axşam keçirilmiş “Sumqayıt”-"Kəpəz"-və “Rəvan”-AZAL görüşlrəi ilə yekun vurulmuşdur.

Onu da qeyd edək ki, Azərbaycan kuboku yarışlarının dörddəbir finalına çıxmış Premyer Liqanın səkkiz komandası bu mərhələnin oyunlarını (“Qarabağ”-“Sumqayıt”, “Qəbələ”–“Zirə”, “İnter”-"Rəvan" və “Neftçi”-"Xəzər-Lənkəran") gələn il martın birinci ongünlüyündə keçirəcəklər.

Elmar Qasımovun növbəti medalı

Azərbaycan cüdoçusu Elmar Qasımov (100 kq-dək) finişə yaxınlaşmaqda olan 2015-ci ili yaxşı əhval-ruhiyyə ilə başa vurur. Tatami ustamız ötən bazar günü Yaponiyanın paytaxtı Tokioda “Böyük dəbilqə” turnirinin bürünc mükafatçısı olmuşdur.

Doxsandan çox ölkə təmsilçilərinin iştirak etdiyi ilin reytinq xarakterli son yarşında Qasımov fəxri kürsüyə aparan yolda Yaponiya, Almaniya və Kuba idmançıları üzərində qələbələrdən sonra yarımfinalda digər yaponiyalı Rınosuk Xaqaya uduzsa da, üçüncü yer uğrunda görüşdə Maksim Rakova (Qazaxıstan) qalib gəlmişdir.

Bununla da Elmar Tokio turnirindən bir qədər əvvəl Çin Xalq Respubliaksının Tsindao və Cənubi Koreyanın Cecu şəhərlərində keçirilmiş “Qran-pri” yarışlarında qazandığı müvəffəqiyyəti təkrar edərək ardıcıl üç mötəbər turnirin bürünc medalını qazanmışdır.

Oqtay BAYRAMOV,
“Xalq qəzeti”