Noyabrın sonunda Latviyanın paytaxtı Riqa şəhərində Döyüş Növləri Olimpiadası – “ Baltik Open 2015" başa çatıb.

Azərbaycan Alpaqut Federasiyası bu yarışda iştirak edərək böyük zəhmət nəticəsində iki dəfə 1-ci yer, dörd dəfə 2-ci yer qazanıb. Peşəkar Şərq Əlbəyaxa döyüş növləri ustası, 8-qat dünya çempionu Musa Abdullayev finalda Latviya idmançısı ilə qarşılaşmada 1-ci yerə layiq görülüb.  Finalda E.Puri rəqibi üzərində parlaq qələbə qazanıb. Sonrakı qarşılaşmalarda Arzu Eyvazova,  Murad Nəsirov və Əlizadə Nəvai 2-ci yer tutublar.

Beynəlxalq Döyüş Növləri Olimpiaya Komitəsi tərəfindən ən yaxşı komanda heyəti üçün Azərbaycan komandasının rəhbəri Vasif Namazova diplom və medal təqdim olunub.

Qeyd edək ki, Alpaqut (Turan döyüş sənəti) – türksoylu əhalinin yaşadığı coğrafiyada, Türk xalqlarının ortaq mədəni dünyagörüşünü təmsil və təbliğ edən, eləcə də milli döyüş ənənələrini inkişaf etdirən, xüsusilə bu qədim xalqların döyüş mədəniyyətini, müasir döyüş sənəti üzərində konsepsiyalaşdıran, dərin fəlsəfi ideoloji məna daşıyan və sirli qalan milli döyüş mədəniyyətinin qlobal mədəniyyətə çıxışını təşkil edən bir idman növüdür. Federasiyanın Azərbaycan başda olmaqla, Almaniya, İngiltərə , Qırğızıstan, Çexiya, Türkiyə, Gürcüstan, İran, Pakistan, Rusiya üzrə rəsmi nümayəndəlikləri var.

Anar TURAN,
“Xalq qəzeti”