Dekabrın birinci günü Azərbaycanın qadın voleybol komandaları arasında Superliqa turnirində keçirilmiş növbəti görüşdə “Lokomotiv” klubu “Gənclik”lə qarşılaşmış və 3:0 hesabı ilə qalib gəlmişdir.

Bu qələbədən sonra “Lokomotiv” 13 xalla turnir cədvəlində lider mövqeyinə yüksəlmişdir. İkinci yeri tutan “Telekom” ondan 2 xal geri qalır, amma ehtiyatda bir oyunu vardır.

Dünən axşam Superliqada daha bir görüş olmuşdur. Bu dəfə “Gənclik” komandasını “Azərreyl” voleybolçuları sınağa çəkmişlər.

Tatami ustalarının Tokio sınaqları 

Tokioda start ərəfəsində olan cüdo üzrə “Böyük dəbilqə” turniri, hər şeydən göründüyü kimi, çox mötəbər olacaq. Yaponiya paytaxtında yarışın mükafatları uğrunda 100-ə qədər ölkədən 500-dən çox tatami ustası mübarizə aparacaq.

Bu turnirin tədricən finişə yaxınlaşan 2015-ci ildə reytinq xarakterli sonuncu yarış olması isə ona marağı daha da artırır. “Böyük dəbilqə”də  Azərbaycan iki idmançı ilə təmsil olunacaq. Bunlar hər ikisi 100 kq-dək çəki dərəcəsində çıxış edən Elmar Qasımov və Elxan Məmmədovdur.

Üç gün davam edəcək turnirdə ilk medallar dekabrın 4-də oynanılacaq, bütün qalib və mükafatçılar isə dekabrın 6-da məlum olacaq.

Burada qeyd etmək yerinə düşər ki, E.Qasımov bu yaxınlarda Cənubi Koreyanın Cecu şəhərində keçirilmiş “Qran-pri” turnirində qazandığı bürünc medal sayəsində Beynəlxalq Cüdo Federasiaysının növbəti reytinq cədvəlində ikinci pillədən birinci mövqeyə yüksəlmişdir. E.Məmmədov isə həmin suyahıda 20-cidir.

Oqtay BAYRAMOV,
“Xalq qəzeti”