UEFA Avropa Liqası yarışlarının qrup mərhələsinin beşinci turunda “Qarabağ”ın “J” qrupunun lideri İngiltərənin “Tottenhem” komandası ilə çox mühüm oyunda məğlubiyyəti (0:1) Ağdam klubunun pley-off mərhələsinə aparan yolda imkanlarını son dərəcə mürəkkəbləşdirmişdir. Hərçənd qarşılıqlı kəskin hücumlarla zəngin olan görüşdən Azərbaycan çempionu da uğurlu nəticə ilə ayrıla bilərdi.

“Monako” (Fransa) –“Anderlext” (Belçika) matçında da qələbəyə qonaqlar sevinmişlər. Özü də belçikalılar meydan sahiblərinə iki cavabsız qolla qalib gəlmişlər-2:0.

Bu oyunlardan sonra 10 xala malik London klubu sonuncu, altıncı turun nəticələrindən asılı olmayaraq, növbəti mərhələyə vəsiqəni özünə tam təmin etmişdir. “Anderlext”in 7, “Monako”nun 6, “Qarabağ”ın 4 xalı vardır.

Qrupda son görüşlər dekabrın 10-da keçiriləcəkdir. Azərbaycan futbolçuları turniri Brüsseldə “Anderlext”ə qarşı oyunla başa vuracaq, “Tottenhem” isə “Monako”nu qəbul edəcək. Bu görüşlərdə Azərbaycan və İngiltərə klublarının qələbələri təqdirində “Qarabağ”la “Anderlext” finişə eyni miqdarda–7 xalla çata bilərlər. Xallar bərabər olduqda isə, artıq bildiyiniz kimi, xoşbəxt komandanı əlavə göstəricilər müəyyənləşdirir.

“C” qrupunda vəziyyət tam aydınlaşmışdır. Beşinci turda PAOK (Yunanıstan)–"Qəbələ" (Azərbaycan) görüşü birinci dövrədəki kimi qolsuz heç-heçə ilə başa çatmış-0:0, “Krasnodar” (Rusiya) isə “Borussiya”nı (Almaniya) məğlubiyyətə uğratmışdır-1:0.

Beş oyunda hərəyə 10 xal toplayan “Borussiya” və “Krasnodar” artıq Liqanın pley-off mərhələsinə hazırlaşa bilərlər. Yunanların 4, “Qəbələ”nin 2 xalı vardır. Finişdə kimin üçüncü olacağını dekabrın 10-da biləcəyik. Son turda Azərbaycan təmsilçisi “Krasnodar”a qalib gəlib qrup mərhələsində ilk qələbəsini qazanmağa çalışacaq, PAOK isə Dortmundda “Borussiya”nın qonağı olacaq.

Oqtay BAYRAMOV,
“Xalq qəzeti”