Həşimov-Topalov. Yenə heç-heçə
Şahmatçımız Vüqar Həşimov Nansizndə (Çin Xalq Respublikası) keçirilən "Böyük dəbilqə" yarışlarının birinci mərhələsinin ikinci dövrəsinə də heç-heçə ilə başlamışdır. Azərbaycanlı qrossmeyster altıncı turda bolqarıstanlı Veselin Topalovla qarşılaşmış və rəqiblər birinci dövrədə olduğu kimi, yenə də bir-birinin müqavimətini qıra bilməyərək hərəyə yarım xalla kifayətlənmişlər.
Bu turun digər iki görüşündə çinli Van Yue hindistanlı Vişvanatan Ananda uduzmuş, Etyen Bakro (Fransa) və Maqnus Karlsen (Norveç) isə heç-heçəyə razılaşmışlar.
Altı turdan sonra turnir cədvəlinə başçılıq edən Karlsenin 4,5 xalı vardır. Bakro 4, Anand 3,5, Həşimov 2,5, Topalov 2, Van Yue 1,5 xal toplamışlar.
Dünən keçirilən yeddinci turda Həşimovu (ağlar) çinli rəqiblə görüş gözləyirdi.{nl}

Nərmin Kazımova fərqi artırır
Azərbaycan şahmatçısı Nərmin Kazımova Yunanıstanda davam edən 8-18 yaşlı oğlan və qızlar arasında dünya çempionatında növbəti qələbə sevinci yaşamışdır. Təmsilçimiz bu çempionat proqramında ən mötəbər yaş qrupu hesab edilən 18 yaşlı qızların turnirinin yeddinci turunda perulu Deysi Goriyə qalib gələrək xal ehtiyatını 6,5-ə çatdırmış və turnir cədvəlinin zirvəsində özünün lider mövqeyini bir qədər də möhkəmləndirmişdir.
Cədvəldə 5,5 xalla ikinci-dördüncü yerləri bölüşdürən Rumıniya, Vyetnam və Yunanıstan şahmatçıları Kazımovadan bir xal geri qalırlar. Dünən keçirilən səkkizinci turda Nərmin rumıniyalı rəqiblə görüşmüşdür.
Abdulla Qədimbəyli isə 8 yaşlı oğlanların yarışında əvvəlkitək liderlər qrupundadır. Yeddinci turda ukraynalı Kirill Şevçenko ilə heç-heçə oynayan şahmatçımız 6 xal toplamışdır və onunla eyni nəticə göstərən İndoneziya və Özbəkistan nümayəndələri ilə ikinci-dördüncü yerləri bölüşdürür. Birinci pillədə irəliləyən Şevçenkonun 6,5 xalı vardır.
Dünya çempionatında ölkəmizi təmsil edən digər şahmatçılara gəldikdə, müxtəlif yaş qruplarında onlar arasında daha yaxşı nəticə göstərən Kənan İzzət 5,5, Nicat Abbasov, Zeynəb İsmayılzadə, Aydan Höcətova və Ülviyyə Fətəliyeva hərəyə 5 xal toplamışlar. Dünya çempionatının finişinə isə dörd tur qalır.

Bir bürünc medal
Bu günlər İtaliyanın Turin şəhərində tələbələr arasında güləş üzrə dünya çempionatı keçirilir. Bu barədə məlumat verən azerisport-un yaydığı xəbərdə bildirilir ki, yarışların birinci günü sərbəst üsulla güləşənlər medallar uğrunda mübarizə aparmışlar.
Azərbaycan bu turnirdə üç nəfərlə təmsil olunmuş və onlardan biri 55 kq çəki dərəcəsində çıxış edən Azər Paşayev üçüncü yeri tutaraq dünya çempionatının bürünc mükafatçısı olmuşdur.

Liderlər itkisiz irəliləyirlər
Bakı Futbol Federasiyasının iki yaş qrupu üzrə təşkil etdiyi "Sabahın ulduzları" VI paytaxt çempionatında dördüncü turun oyunları keçirilmişdir. Federasiyanın mətbuat xidmətindən aldığımız məlumatda bildirilir ki, bu turda liderlər növbəti qələbələrini qazanmışlar.
Yuxarı yaşlı yeniyetmələrin (12-13 yaşlılar) turnirində "Bakı FK ulduzları" komandası dörd turda yüzfaizli nəticə göstərmişdir - 12 xal. Üç oyunda 9 xal toplayan "Neftçi" İSM-nin yetirmələri də itkisiz irəliləyirlər.
Aşağı yaşlı futbolçuların (9-11 yaşlılar) yarışında "A" qrupunun lideri "Neftçi" PFK üç görüşdə 9 xal qazanmışdır. "B" qrupunda ilk iki pillədə olan "Bakı" və "Neft Daşları" komandaları isə dörd turdan sonra 12 xala malikdirlər.

Oqtay BAYRAMOV, "Xalq qəzeti"