Çempionlar Liqasında qələbə və məğlubiyyət

Qadın voleybol komandaları arasında Çempionlar Liqası yarışlarının qrup mərhələsinin üçüncü turunda Azərbaycanın “Lokomotiv” klubu “Ştutqart” (Almaniya) ilə görüşdə 3:0 hesabı ilə inamlı qələbə qazanmışdır.

Meydan sahibləri rolunda çıxış edən voleybolçularımız hər üç hissədə qonaqlardan üstün oyun nümayiş etdirərək onlara heç bir ümid yeri qoymamışlar. Hissələrin hesabı da buna sübutdur (25:18, 25:17, 25:18 ). Turnirdə ikinci qələbədən sonra “Lokomotiv” xal ehtiyatını 6-ya çatdırmışdır.

Bu komandaların çıxış etdikləri qrupda daha bir oyun isə dünən axşam Kazanda keçirilmişdir. Bakı vaxtı ilə saat 20-də başlanan görüşdə “Azərreyl” Rusiyanın “Dinamo” klubunun qonağı olmuşdur.

“Lokomotiv”in Bakıda “Ştutqart” ilə matçda qələbəyə sevindiyi axşam Azərbaycan Superliqasının digər iştirakçısı “Telekom” səfərdə “Drezdner” (Almaniya) ilə qarşılaşmış və 0:3 hesabı ilə uduzmuşdur.

Türkiyənin “Fənərbaxça” və Polşanın “İmpel Vrotslav” klubları da növbəti mərhələyə vəsiqə uğrunda “Telekom” və “Drezdner” ilə eyni qrupda mübarizə aparırlar. Üç turdan sonra qrupun lideri 8 xala malik “Fənərbaxça”dır. “Telekom” hələlik 1 xalla cədvəldə sonuncu yerdədir.

Çindən Koreyaya

Bir həftə əvvəl Çin Xalq Respublikasının Tsindao şəhərində “Qran-pri” turnurində böyük müvəffəqiyyətlə çıxış edərək 6 medal-2 qızıl, 1 gümüş və 3 bürünc mükafat qazanmış Azərbaycanın ən yaxşı cüdoçuları indi də Koreya Respublikasının qonağıdırlar. 

Cecu şəhərində keçirilən reytinq xarakterli növbəti “Qran-pri” turnirinin mükafatları uğrunda 70-dən çox ölkədən 450-yə qədər iştirakçı mübarizə aparır. Dünən, yarışın birinci günü tatami üzərinə dəvət olunan Azərbaycanın üç təmsilçisindən Orxan Səfərov (60 kq-dək) daha uğurla çıxış etmişdir. Cüdoçumuz bürünc medal uğrunda görüşdə venesuelalı Xavyer Quedes ilə qarşılaşmış və qalib gələrək bu yarışda ölkəmizə ilk mükafat qazandırmışdır.

Bu gün növbəti çəki dərəcələrində görüşlər keçiriləcək, sabah isə “Qran-pri”nin bütün qalib və mükafatçıları məlum olacaq.

Oqtay BAYRAMOV,
“Xalq qəzeti”