İslandiyanın paytaxtı Reykyavikdə şahmat üzrə Avropa çempionatı artıq finişin astanasındadır.

Yeddinci turda Azərbaycan komandalarının iştirakı ilə keçirilmiş hər iki matç 2:2 hesabı ilə başa çatmışdır. Kişi qrossmeysterlərimiz Latviya, qadın şahmatçılarımız isə Ermənistan yığmaları ilə heç-heçə oynamışlar.

Kişi komandalarının çempionatında yeddi turdan sonra turnir cədvəlinin birinci pilləsində irəliləyən Rusiya 13 xal toplamış, onun ən yaxın izləyiciləri Fransa və Azərbaycanın isə 10 xalı vardır. Qadınlardan ibarət komandamız 7 xalla 16-cı yerdədir.

Dünən səkkizinci turun görüşləri keçirilmiş, bu gün isə sonuncu turun matçlarında Avropa çempionatının qalibi, habelə qızıl və gümüş medalların sahibləri məlum olacaq.

“Lokomotiv” və “Telekom”

Azərbaycanın qadın voleybol komandaları arasında Superliqa turnirinin növbəti iki görüşündə “Telekom” klubu “Azəryol”a qalib gəlmiş-3:1, “Lokomotiv” isə “Azərreyl”i üç hissədə məğlubiyyətə uğratmışdır-3:0.

Bu oyunlardan sonra çempionatda “Lokomotiv” və “Telekom” komandaları daha yaxşı nəticə göstərmişlər. Liderlər dörd görüşdə hərəyə 9 xal toplamışlar. Üçüncü-dördüncü yerləri 6 xala malik “Azəryol” və “Azərreyl” tuturlar.

Oqtay BAYRAMOV, “Xalq qəzeti”