Ölkəmizin tatami ustaları Çin Xalq Respublikasının Tsindao şəhərində keçirilən “Qran-pri” turnirinin elə birinci günü iki qızıl medal qazanmışlar.

Cüdo aləmində ən mötəbər yarışlardan biri hesab edilən və XXXI Yay Olimpiya Oyunlarına lisenziya xalları verən bu mötəbər yarışın startında təmsilçilərimizdən İlqar Müşkiyev (60 kq) və Nicat Şıxəlizadə (66 kq) fərqlənmişlər. Onlar bütün rəqiblərindən üstün hazırlıq nümayiş etdirərək fəxri kürsünün zirvəsinə yüksəlmişlər.

Dünən isə daha üç cüdoçumuz Rüstəm Orucov (73 kq), Əbdülhəqq Rəsullu və Hüseyn Rəhimli (hər ikisi 81 kq) tatami üzərinə dəvət olunmuşlar.

Orucov yalnız finalda uduzub, gümüş medal qazanmışdır.

Oqtay BAYRAMOV,
“Xalq qəzeti”