Azərbaycanlı qrossmeysterlərin komandası İslandiya paytaxtında keçirilən şahmat üzrə Avropa çempionatında medallara doğru daha bir addım atmışdır.

Şəhriyar Məmmədyarov, Teymur Rəcəbov, Arkadi Naydic və Rauf Məmmədovdan ibarət heyət altıncı turda Hollandiya yığmasını 2,5:1,5 hesabı ilə məğlubiyyətə uğratmışdır. Bu matçda qələbəmizi üçüncü taxtada Naydiçin İvan Sokolov ilə görüşdə müvəffəqiyyəti təmin etmişdir (qalan üç taxtada rəqiblər heç-heçəyə razılaşmışlar).

Finişə mükafatçılar üçlüyündə çatmaq əzmində olan komandaların iştirakı ilə keçirilmiş daha bir neçə görüşdə Rusiya şahmatçıları Gürcüstan yığmasına, fransızlar ukraynalı rəqiblərinə, macarlar Norveç komandasına, ispanlar italyanlara, Polşa Finlandiyaya, İngiltərə isə İsveçə qalib gəlmişlər. Maraqlıdır ki, bu görüşlərin də hamısında 2,5:1,5 hesabı qeydə alınmışdır.

Hesabat turunun bütün oyunlarına yekun vurulduqda aydın olmuşdur ki, 11 xala malik Rusiya vahid lider mövqeyini özündə saxlamış, Fransa (10 xal) ikinci pilləyə yüksəlmiş, Azərbaycan isə 9 xalla əvvəlkitək üçüncü yerdədir. Yeddi ölkə Macarıstan, Ukrayna, Gürcüstan, İspaniya, Ermənistan, Polşa və Latviya altı turda hərəyə 8 xal toplamışlar.

Qadın komandalarının turnirində Azərbaycan şahmatçıları Polşa yığmasına 1,5:2,5 hesabı ilə uduzmuşlar. Bu komandamız son üç turu 6 xalla 16-cı yerdə qarşılamışdır. Turnir cədvəlinə başçılıq edən Rusiya komandası isə 11 xal toplamışdır.

Dünən axşam Avropa çempionatının iştirakçıları yeddinci turun oyunlarında qarşılaşmışlar. Azərbaycanın kişilərdən ibarət komandası latviyalı qrossmeysterlərlə görüşmüş, qadın şahmatçılarımızın isə rəqibi Ermənistan komandası olmuşdur.

Oqtay BAYRAMOV,
“Xalq qəzeti”