Moskvadan gümüş mükafatlarla

Moskvada üç gün davam edən Avropa Millətlər Kuboku  turnirində Azərbaycanın sərbəst və yunan-Roma güləşi komandaları yarış sahibləri Rusiya kollektivlərindən sonra ikinci yerə sahib olmuşlar.

“Sərbəstlərimiz” qrup görüşlərində Belarus və Polşa yığmalarına müvafiq surətdə 7:1 və 5:3 hesabı ilə qalib gəlmiş, finalda digər qrupun ən yaxşı komandası Rusiya güləşçilərinə uduzmuşlar-3:5. “Klassiklərimiz” qrup mərhələsində belaruslu və türkiyəli rəqiblərindən üstün ustalıq nümayiş etdirmiş (hər iki matçda 5:3 hesabı qeydə alınmışdır), həlledici görüşdə Rusiya idmançılarına məğlub olmuşlar-2:6. Nəticədə hər iki komandamız turnuri gümüş medallarla başa vurmuşdur.

Qadın güləşçilərin yarışında isə yığmamız beşinci yerlə kifayətlənmişdir. Bu turnir də Rusiya komandasının qələbəsi ilə başa çatmışdır.

Dörd bürünc medal

Azərbaycan cüdoçuları Port-Luidə (Mavriki) keçirilmiş Afrikanın açıq çempionatında dörd bürünc medal qazanmışlar. Bu mükafatlar öz çəki dərəcələrində üçüncü yeri tutan Ayşə Qurbanlı (48 kq), Əbdülhəqq Rəsullu (81 kq), Məmmədəli Mehdiyev (90 kq) və Uşanqi Kokauriyə (+100 kq) təqdim olunmuşdur.

Afrika çempionatının azərbaycanlı mükafatçıları bu uğurları sayəsində həm də hərəyə 40 reytinq xalı qazanmışlar. Daha bir təmsilçimiz 81 kq çəki dərəcəsində beşinci yeri tutan Hüseyn Rəhimli isə öz hesabına 20 reytinq xalı yazdırmışdır.

“Qarabağ” fərqi artırır

AZAL-"Kəpəz"-1:1, “Zirə”-"Sumqayıt"-3:2, “Xəzər-Lənkəran”-"Qarabağ"-0:1, “Neftçi”-"Rəvan"-2:3, “Qəbələ”-"İnter"-1:1.

Topaz  Premyer Liqasının 12-ci turunda qeydə alınmış bu nəticələrdən sonra turnir cədvəlinə tək-tənha başçılıq edən “Qarabağ” zirvədə öz mövqeyini daha da möhkəmləndirmişdir. İndi 29 xala malik Ağdam klubu çempionluq mübarizəsində əsas rəqibi, son oyunlarda qalib gəlməyi sanki yadırğayan “Qəbələ”dən (22) yeddi xal irəlidədir. Üçüncü pillədə irəliləyən “Zirə” isə artıq xal ehtiyatını 21-ə çatdırmışdır. Debütant komanda üçün, əlbəttə, çox yaxşı nəticədir.

Oqtay BAYRAMOV,
“Xalq qəzeti”