Gələn il avqustun 5-dən 21-dək Braziliyanın Rio-de-Janeyro şəhərində keçiriləcək XXXI Yay Olimpiya Oyunları və bu yarışlardan dərhal sonra starta çıxacaq XV Paralimpiya Oyunları ulə dünya idman ictimaiyyəti arasındakı məsafə getdikcə qısalır. İndi Olimpiadanın təntənəli açılış mərasiminə 271 gün qalır.

Bəs Azərbaycan idmançıları Rioya neçə lisenziya qazanmışlar? Olimpiya vəsiqələrimizin sayı hələlik 23-dür. Onların yarısına sərbəst və yunan-Roma üsulu ilə güləşənlər, habelə qadın güləşçilər sahib olmuşlar. Qalan lisenziyalar isə boks, yüngül atletika, avarçəkmə və gimnastika ustalarının payına düşür. Xatırladaq ki, hələlik sonuncu lisenziyamıza bu yaxınlarda Qlazqoda (Şotlandiya) keçirilmiş idman gimnastikası üzrə dünya çempionatında çıxışlarını bürünc medalla başa vuran birinci Avropa Oyunlarının beşqat mükafatçısı Oleq Stepko sevinmişdir.

Azərbaycan paralimpiyaçılarının isə hesbında 11 llisenziya vardır. Onlardan dördü cüdoda, daha dördü yüngül atletikada, ikisi üzgüçülükdə, biri pauerliftinq idmanında qazanılmışdır.

Əgər Olimpiya və Paralimpiya Oyunlarına lisenziya xarakterli yarışların böyük bir qisminin hələ bundan sonra, xüsusən də 2016-cı ilin birinci yarısında keçiriləcəyini nəzərə alsaq, şübhəsiz, Azərbaycan idmanının ən yaxşı nümayəndələrinin Olimpiya və Paralimpiya “biletlərinin” sayı qat-qat artacaq.

Oqtay BAYRAMOV,
“Xalq qəzeti”