Bu gün Moskvada güləş aləmində maraqla gözlənilən Avropa Millətlər Kuboku turnirində ilk görüşlər keçiriləcək. Fəxri mükafat uğrunda yarış sahibləri Rusiya idmançıları ilə yanaşı, Azərbaycan, Türkiyə, Gürcüstan, Ukrayna, Belarus, Polşa və Almaniya kollektivləri mübarizə aparacaqlar.

Üç gün davam edəcək turnirdə birinci olaraq qadınlardan ibarət komandalar qalib və mükafatçıları müəyyənləşdirəcəklər. Azərbaycan güləşçiləri Rusiya, Ukrayna, Belarus, Polşa və Türkiyə yığmaları ilə üz-üzə gələcəklər.

Sonra xalça üzərinə sərbəst güləş ustaları və yunan-Roma üsulu ilə güləşənlər dəvət olunacaqlar. “Sərbəstlərimizin” rəqibləri Rusiya, Türkiyə, Gürcüstan, Belarus və Polşa komandaları olacaq, “klassiklərimiz” isə Rusiya, Ukrayna, Almaniya, Belarus və Türkiyə kollektivləri ilə görüşəcəklər.

“Lujniki” Olimpiya Kompleksinin “Drujba” universial idman zalında keçiriləcək yarışlara noyabrın 8-də yekun vurulacaqdır.

Oqtay BAYRAMOV,
“Xalq qəzeti”