Superliqa starta çıxır

Qadın voleybol komandaları arasında Azərbaycan Superliqasında növbəti turnir starta hazırdır. Artıq noyabrın 6-da ilk oyunlar keçriləcək, ilk nəticələr qeydə alınacaqdır.

Bu dəfə çempionatın medalları uğrunda altı komanda mübarizə aparacaq. Bunlar Bakının “Azərreyl”, “Azəryol”, “Lokomotiv”, “Telekom” komandaları, Azərbaycanın gənclərdən ibarət yığma kollektivi və Gürcüstanın “Tbilisi” klubudur.

Qonşu ölkə təmsilçisinin Azərbaycan Superliqasında iştirakı, əlbəttə, maraqlı məqamdır. Yarışın gedişində bizim azarkeşlərin “Tbilisi”nin də hazırlığını və oyun ustalığını qiymətləndirmək imkanı olacaq. Burada onu da qeyd etmək yerinə düşər ki, 2017-ci ildə keçiriləcək qadın komandaları arasında Avropa çempionatının final mərhələsinə iki ölkə Azərbaycan və Gürcüstan ev sahibliyi edəcəklər.

Voleybol həvəskarları Superliqanın birinci turunda üç oyunu izləmək imkanı qazanacaqlar. Bu oyunlardan ikisində “Lokomotiv”lə “Telekom”, “Azərreyl” ilə “Azəryol” üz-üzə gələcəklər, daha bir görüşdə isə gənclərdən ibarət komanda “Tbilisi” ilə qarşılaşacaq.

Reykyavik azərbaycanlı
çempionları gözləyir

Makedoniyanın paytaxtı Skopyedə klublararası şahmat üzrə Avropa kuboku yarışı bu yaxınlarda başa çatmışdır. İndi isə qədim və müdrik oyun pərəstişkarları daha bir mötəbər hadisə ərəfəsindədirlər. Tezliklə Reykyavikdə (İslandiya) başlanacaq kişi və qadın komandaları arasında Avropa çempionatı qitənin hər yerində böyük maraqla gözlənilir.

Hazırkı Avropa çempionu Azərbaycanın kişilərdən ibarət komandası bu adı özündə qoruyub-saxlamaq əzmindədir. Qrossmeysterlərimiz Reykyavik sınaqlarına Teymur Rəcəbov, Şəhriyar Məmmədyarov, Arkadi Naydiç, Rauf Məmmədov və Eltac Səfərlidən ibarət heyətlə hazırlaşırlar.

Qadın şahmatçıların yarışında isə ölkəmizin şərəfini Zeynəb Məmmədyarova, Ülviyyə Fətəliyeva, Gülnar Məmmədova, Xəyalə Abdulla və Nərmin Kazımova qoruyacaqlar.

Bütün komandalar İsveçrə sistemi üzrə keçirilib doqquz turu əhatə edəcək Avropa çempionatında beş şahmatçı ilə təmsil olunacaqlar (dörd əsas və bir ehtiyat oyunçu).  Birinci turun görüşləri noyabrın 13-nə təyin edilmiş, sonuncu, doqquzuncu turun matçları isə noyabrın 22-də keçiriləcəkdir. 

Dünya çempionatı  finişin astanasında

Yunanıstanda keçirilən 8-18 yaşlı oğlan və qızlar arasında şahmat üzrə dünya çempionatı artıq başa çatmaq üzrədir. On bir turdan ibarət yarışın doqquz turundan sonra Azərbaycanın bir neçə təmsilçisi medal qazanmaq imkanını özündə saxlayır.

Məhəmməd Muradlı 12 yaşlı oğlanların turnirində 7 xal toplamış və turnir cədvəlinin ilk üç pilləsində irəliləyən  İran, Hindistan və ABŞ şahmatçılarından yarım xal  geri qalır. Xəzər Babazadə isə 10 yaşlı iştirakçılar qrupunda son iki turu 7 xalla qarşılamışdır. Bu yaş qrupunda polşalı liderin 8 xalı vardır.

Səkkiz yaşlı qızların çempionatında Samra Qasımovanı (7 xal) hərəyə 7,5 xalla birinci-ikinci yerləri tutan Bolqarıstan və Çin nümayəndələrindən yarım addımlıq məsafə ayırır. Ayan Allahverdiyeva isə 10 yaşlılar qrupunda doqquz görüşdə 6,5 xal qazanmışdır.

Dünən axşam dünya çempionatında 10-cu turun görüşləri oynanılmışdır. Çempionatın qalib və mükafatçıları bu günə təyin edilmiş sonuncu turda müəyyənləşəcək.

Oqtay BAYRAMOV,
“Xalq qəzeti”