UEFA Avropa Liqası turnirinin qrup mərhələsinin ikinci dövrəsində pley-off görüşlərinə vəsiqə uğrunda mübarizəni davam etdirən Azərbaycan klubları sabah dördüncü turun oyunlarında meydana çıxacaqlar.

Tofiq Bəhramov adına Respublika Stadionunda “Qarabağ”-"Monako" (Fransa) görüşündə topa ilk zərbə saat 20-də endiriləcəkdir. Oyunu rumıniyalı hakim Pavel Kristian Balay idarə edəcəkdir.

Almaniyanın Dortmund şəhərində yerli “Borussiya” ilə “Qəbələ”nin görüşü isə Bakı  vaxtı ilə saat 22-yə təyin edilmişdir. UEFA bu oyunun hakimiliyini Belçika Futbol Federasiyasının nümayəndəsi Sebastyen Delferyerə həvalə etmişdir.

Avroliqa matçları ərəfəsində Topaz Premyer Liqasında növbəti turun oyunları keçirilmiş və “Qarabağ” AZAL üzərində qələbə sayəsində (2:0) xal ehtiyatını 26-ya çatdıraraq turnir cədvəlinin zirvəsində öz mövqeyini bir qədər də möhkəmləndirmişdir. Son turda “Kəpəz”ə uduzan (1:2) “Qəbələ”ni (21 xal)  Ağdam klubundan artıq beş xallıq bir məsafə ayırır.

Milli çempionatımızın turnir cədvəlində iki liderin ən yaxın izləyiciləri isə 19 xala malik “İnter”, hərəyə 18 xal toplayan “Kəpəz” və “Zirə”dir.

Oqtay BAYRAMOV,
“Xalq qəzeti”