Azərbaycan boksçusu Elvin Məmişzadə (52 kq) Qətərin paytaxtı Doha şəhərində yenicə başa çatmış dünya çempionatında əsl ustalıq nümunəsi göstərmişdir.

 İyunda Birinci Avropa Oyunlarının çempionu olmuş istedadlı dəri əlcək ustası dünya çempionatı rinqini də qızıl medal və Rio-de-Janeyro Olimpiadası-2016-ya lisenziya ilə tərk etmişdir. Finalda kubalı Yosbani Veytianı məğlubiyyətə uğradan Elvinin bu böyük nailiyyəti ölkəmizin dövlət müstəqilliyinin 24-cü ildönümünə gözəl töhfədir!

Dünya çempionatında qaliblərin mükafatlandırılması mərasimində Azərbaycanın daha üç boksçusu fəxri kürsüyə dəvət olunmuşdur. Albert Səlimov (60 kq) gümüş, Pərviz Bağırov (69 kq) və Abdulqadir Abdullayev (91 kq) bürünc medallar qazanmışlar. Məmişzadə kimi, Bağırov da Olimpiada rinqində döyüşəcək. Səlimov bu  hüququ əvvələr özünə təmin etmişdir. Abdullayev isə növbəti təsnifat yarışlarında Olimpiya “biletinə” sahib olmağa çalışacaq.

Təmsilçilərimizin Qətərdə qazandıqları 4 medal–1 qızıl,

1 gümüş və 2 bürünc mükafat dünya çempionatında komanda hesabında yığmamızı üçüncü mövqeyə çıxarmışdır. Birinci-ikinci yerləri isə müvafiq surətdə Kuba (4 qızıl, 2 gümüş,

1  bürünc medal) və Rusiya (2+1+1) komandaları tutmuşlar.

Boksçuların növbəti dünya çempionatı 2017-ci ildə Hamburqda (Almaniya) keçiriləcəkdir.

Oqtay BAYRAMOV,
“Xalq qəzeti”