Azərbaycan boksçuları Qətərin paytaxtı Doha şəhərində keçirilən Rio-de-Janeyro Olimpiadası-2016-ya lisenziya xarakterli dünya çempionatında uğurlu çıxışlarını davam etdirirlər.

Rüfət Hüseynov (49 kq) və Lorenso Sotomayor (64 kq) artıq ikinci qələbələrini qazanmışlar. Təmsilçilərimiz səkkizdəbir finalda müvafiq surətdə özbəkistanlı və əlcəzairli rəqiblərini məğlubiyyətə uğradaraq dörddəbir finala çıxmışlar.

Həmin gün Tayfur Əliyev (56 kq) və Abdulqadir Abdullayev də (91 kq) rinqi qələbə ilə tərk etmişlər. Əliyev Monqolustan, Abdullayev isə Əlcəzair nümayəndələrinə qalib gəlmişlər. Bu boksçularımız da dörddəbir finalda çıxış edəcəklər.

Dünən dünya çempionatında Azərbaycanın dəri əlcək ustalarının iştirakı ilə daha dörd görüş keçirilmişdir. Bu döyüşlərdə Elvin Məmişzadə (52 kq), Albert Səlimov (60 kq), Pərviz Bağırov (69 kq) və Teymur Məmmədov (81 kq) rinqə dəvət olunmuşlar.

Macar Tomaş Boqnar

Bu gün futbol üzrə 2016-cı il Avropa çempinatının seçmə yarışları çərçivəsində Bakı Olimpiya Stadionunda keçiriləcək Azərbaycan-İtaliya görüşünü şotlandiyalı hakim Uilyam Qollumun idarə edəcəyi barədə artıq xəbər vermişik.

UEFA oktyabrın 13-də millimizin bu yarışların təqvimində Sofiyanın “Vasil Levski” stadionunda Bolqarıstan komandası ilə son oyununun da hakimlərinin adlarını açıqlamışdır. Matç Tomaş Boqnarın başçılığı ilə macarıstanlı hakimlər briqadasına həvalə olunmuşdur.

Oqtay BAYRAMOV, “Xalq qəzeti”