Azərbaycanın dövlət müstəqilliyinin 24-cü ildönümünə həsr edilən “Baku Open-2015" beynəlxalq şahmat turnirinə yekun vurulmuşdur. Yarışın qalibləri finişə eyni nəticə ilə çatmışlar.

Əllidən çox rəqibin iştirak etdiyi turnirdə iranlı Ehsan Qaem Maqami, azərbaycanlı qrossmeyster Nicat Abbasov və hindistanlı B.Adxibani 9 mümkün xaldan hərəyə 6,5 xal toplamışlar. Əlavə göstəricilərə görə birinci yeri Maqami tutmuşdur. Abbasov ikinci mükafata sahib olmuşdur.

Azərbaycan idmançıları fəxri kürsüdə

Cənubi Koreyada keçirilən Hərbçilərin VI Ümumdünya Oyunlarının taekvondo turnirinin birinci günü mübarizəyə qoşulan Azərbaycan idmançısı Radik İsayev (+87 kq) çıxışlarını fəxri kürsüdə başa vurmuşdur.

Dünya çempionu və birinci Avropa Oyunlarının qalibi olan İsayev öz mükafatlar kolleksiyasını bürünc medalla zənginləşdirmişdir.

Dünən axşam Koreyadan növbəti fərəhli xəbər aldıq. Taekvondoçu Ayxan Tağızadə (68 kq) gümüş medal qazanmış, yunan-Roma üsulu ilə güləşən Rafiq Hüseynov (80 kq) isə Hərbçilərin Ümumdünya Oyunlarının çempionu olmuşdur.

Oqtay BAYRAMOV, “Xalq qəzeti”