Azərbaycan boksçuları Qətərin paytaxtı Doha şəhərində keçirilən Rio-de-Janeyro Olimpiadası-2016-ya lisenziya xarakterli dünya çempionatına inamlı qələbələrlə başlamışlar. Çempionatın birinci günü rinqə çıxan hər iki dəri əlcək ustamız döyüşdən qalib ayrılmışdır.

Əvvəlcə 64 kq çəki dərəcəsində çıxış edən Lorenso Sotomayor qələbəyə sevinmişdir. Təmsilçimiz kanadalı rəqibi Artur Biyarslanovu məğlubiyyətə uğratmışdır. Sonra isə Rüfət Hüseynov (49 kq) Mərakeş boksçusu İmad Axoyona qalib gəlmişdir.

Dünya çempionatında bu iki boksçumuzun növbəti rəqibləri də artıq məlumdur. İkinci mərhələdə Sotomayor Əlcəzair idmançısı ilə qarşılaşacaq, Hüseynovu isə özbəkistanlı Xasanbay Dusmatov ilə görüş gözləyir.

Xəbər verdiyimiz kimi, Azərbaycan Doha turnirində səkkiz nəfərlə təmsil olunur. Dünən dünya çempionatı növbəti çəki dərəcələrində döyüşlərlə davam etdirilmişdir.

Oqtay BAYRAMOV,
“Xalq qəzeti”