Dünən Qətərin paytaxtı Doha şəhərində gələn il avqustun 5-dən 21-dək Rio-de-Janeyroda (Braziliya) keçiriləcək XXXI Yay Olimpiya Oyunlarına lisenziya xarakterli boks üzrə dünya çempionatına start verilmişdir.

Çempionatda Azərbaycanı səkkiz dəri əlcək ustası təmsil edir. Bunlar Rüfət Hüseynov (49 kq), Elvin Məmişzadə (52 kq), Tayfur Əliyev (56 kq), Albert Səlimov (60 kq), Lorenso Sotomayor (64 kq), Pərviz Bağırov (69 kq), Teymur Məmmədov (81 kq) və Abdulqadir Abdullayevdir (91 kq).

Bu barədə azerisport-un yaydığı xəbərdə həmçinin bildirilir ki, 49, 52 və 81 kq çəki dərəcələrində finalçılar, 56, 60, 64, 69 və 75 kq çəkilərin hərəsində üç mükafatçı, 91 kq və 91 kq-dan yuxarı çəki dərəcələrində isə çempionlar Rio Olimpiadası-2016-ya lisenziya qazanacaqlar.

Dünya çempionatının təntənəli açılış mərasimində Azərbaycan komandasının bayraqdarı London Olimpiadası 2012-nin bürünc mükafatçısı Teymur Məmmədov olmuşdur.

Oqtay BAYRAMOV,
“Xalq qəzeti”