Bakıda davam edən şahmat üzrə Dünya kuboku yarışı həlledici mərhələyə qədəm qoymuşdur. Dünən “Fairmont” hotelində dörddəbir final görüşlərinə start verilmişdir.

Kuboka 128 iddiaçıdan 120-nin, o cümlədən keçmiş dünya çempionları Vladimir Kramnik (Rusiya) və Veselin Topalovun (Bolqarıstan) mübarizəni dayandırdıqları bu çox mötəbər turnirdə indi yalnız səkkiz rəqib çıxışlarını davam etdirir. Fəxri mükafatın və iddiaçıların dünya şahmat tacı uğrunda növbəti turnirinə iki vəsiqənin sahibləri də məhz bu qrossmeysterlər arasındadır.

Dünya kuboku meydanında yarımfinalın astanasında yoluna davam edən səkkiz iştirakçıdan ikisi Rusiya təmsilçiləri, qalan altısı isə Azərbaycan, Çin, Hollandiya, Fransa, ABŞ və Ukrayna şahmatçılarıdır.

Dörddəbir finalın ilk görüşü belə başa çatmışdır: Şəhriyar Məmmədyarov –Sergey Karyakin (Rusiya) 0,5–0,5,  Pyotr Svidler (Rusiya)-Vey İ (Çin) 0,5–0,5, Aniş Giri (Hollandiya)-Maksim Vaşye-Laqrav (Fransa) 0,5–0,5, və Hikaru Nakamura (ABŞ)-Pavel Elyanov (Ukrayna) 0–1.

Əvvəlki  mərhələlərdəki kimi, əgər dörddəbir finalda da iki klassik görüşdən sonra hesab heç-heçə olarsa, yarımfınalçıları tay-breklər müəyyənləşdirəcək.

Oqtay BAYRAMOV,
“Xalq qəzeti”