Azərbaycanın 19 yaşadək qızlardan ibarət futbol komandası 2016-cı il Avropa çempionatının seçmə mərhələsində hər üç rəqibini məğlubiyyətlə barışmağa məcbur etmişdir.

Üstəlik də, futbolçularımız Uelsdə keçirilmiş bu turnirin iki görüşündə böyük hesabla qələbə qazanmışlar. Belçika ilə oyunda 3:0, meydan sahiblərinə qarşı görüşdə 4:1 hesabı qeydə alınmışdır. Xorvatiya ilə matçda isə yığmamızın üstünlüyü bir top fərqlə ifadə olunmuşdur-2:1.

Nəticədə üç görüşdə maksimum miqdarda 9 xal toplayan Azərbaycan futbolçuları qrupun qalibi olaraq Avropa çempionatının elit mərhələsinə vəsiqə qazanmışlar. Belçikalılar finişə 6, xorvatlar 3 xalla çatmışlar, Uels komandası isə hər üç oyunda uduzmuşdur.

Elit mərhələdə komandamızın rəqibləri noyabrın 13-də İsveçrənin Nyön şəhərində keçiriləcək püşkatma mərasimində məlum olacaq.

Oqtay BAYRAMOV, 
“Xalq qəzeti”