Azərbaycanın “Qəbələ” klubu UEFA Avropa Liqası turnirinin qrup mərhələsinin elə birinci oyununda xalların hesabını açdı. “Bakcell Arena”da təmsilçimizin Yunanıstanın PAOK komandası ilə qarşılıqlı hücumlar şəraitində davam edən görüşündə hər iki rəqibin fərqlənmək üçün bütün cəhdlərinə baxmayaraq, tamaşaçılar tribunaları qol görmədən tərk etdilər-0:0.

Bu klubların çıxış etdikləri “C” qrupunun digər matçında “Borussiya” (Almaniya) Dortmundda “Krasnodar”ı (Rusiya) 2:1 hesabı ilə məğlubiyyətə uğratmış və qrupun ilk lideri olmuşdur.

Qrupda növbəti görüşlər oktyabrın 1-də keçiriləcəkdir. Həmin gün Qəbələ futbolçuları “Krasnodar”ın qonağı olacaqlar.

Ardıcıl ikinci il Avroliqanın qrup mərhələsində oynamaq hüququ qazanmış Ağdamın “Qarabağ” komandası isə futbolun vətənində “Tottenhem” ilə görüşün artıq 7-ci dəqiqəsində Almeydanın on bir metrlik zərbə ilə vurduğu top sayəsində hesabda irəli çıxdı. Təəssüf ki,  bu üstünlüyü qoruyub saxlamaq mümkün olmadı. London klubu öz qapısından buraxdığı topa qalan vaxt ərzində üç qol ilə  cavab verib 3:1 hesabı ilə qələbə qazandı.

Həmin axşam “J” qrupunun “Anderlext” (Belçika)-"Monako" (Fransa) görüşündə isə heç-heçə qeydə alınmışdır – 1:1. Start turundan sonra qrupun turnir cədvəlinə “Borussiya” başçılıq edir.

Oktyabrın birinci günü “Qarabağ” Bakıda “Anderlext”i qəbul edəcək.

Oqtay BAYRAMOV, “Xalq qəzeti”