Las-Veqasda (ABŞ) başa çatmış  dünya  çempionatında Azərbaycan komandasına sonuncu medalı yarışların finişində  sərbəst üsulla güləşən Cəmaləddin  Məhəmmədov  qazandırmışdır. Təmsilçimiz 125 kq  çəki  dərcəsində  çıxışlarını  fəxri  kürsünün ikinci pilləsində  başa vuraraq gümüş mükafata  sahib olmuş,  həm də yığmamıza Olimpiada — 2016-ya vəsiqəni  təmin  etmişdir.

Altı  gün davam  edən  dünya  çempionatında  Azərbaycanın  yunan-Roma, sərbəst  güləş  ustaları  və qadın  idmançılarımız  üst-üstə 8 medal  və gələn il avqustun 5-dən 21-dək Braziliyanın Rio-de-Janeyro  şəhərində  keçiriləcək XXXI  Yay Olimpiya Oyunlarına 11 lisenziya qazanmışlar.

Azərbaycan güləşçiləri  Olimpiadaya  vəsiqələrin sayına görə yalnız  Rusiya komandasından (12 lisenziya)  geri  qalmışlar. Bu göstərici  üzrə üçüncü yeri İran yığması tutmuşdur (8).

Okeanın o tayında  dünya  çempionatı  Olimpiya oyunlarına  lisenziya  xarakterli  ilk güləş yarışı idi. İndi güləşçilərimiz gələn  ilin baharında  Serbiya, Monqolustan  və  Türkiyədə  keçiriləcək Avropa  və dünya  təsnifat turnirlərində digər  olimpiya çəkilərində  də  lisenziya  qazanmağa hazırlaşacaqlar.

Oqtay BAYRAMOV,
“Xalq qəzeti”