Ölkəmizdə bədii gimnastikanın lideri, “Bakı-2015"birinci Avropa Oyunlarının gümüş mükafatçısı Marina Durunda Almaniyanın Ştutqart şəhərində keçirilən Rio-de-Janeyro Olimpiadası – 2016-ya lisenziya xarakterli dünya çempionatında qarşısında duran əsas vəzifəni müvəffəqiyyətlə həll etmiş, olimpiyaçı olmaq hüququnu sübuta yetirmişdir.

Gimnastımız çoxnövçülüyün final mərhələsində halqa, top, gürzlər və lentlə çıxışlarının ümumi yekununda 24 iştirakçı arasında altıncı nəticə göstərərək Olimpiya oyunlarına vəsiqə qazanmaq məqsədinə çatmışdır.

Dünən isə qrup hərəkətləri komandaları çoxnövçülükdə mübarizəyə başlamışlar. Azərbaycanı Siyana Vasileva, Səbinə Abbasova, Diana Doman, Aynur Mustafayeva və Aleksandra Platonovadan ibarət heyət təmsil edir. Bu yarışda Olimpiadaya “bileti” ilk on yeri tutan komandalar qazanırlar.

Oqtay BAYRAMOV,
“Xalq qəzeti”