Azərbaycanın avarçəkmə ustaları gələn il avqustun 5-dən 21-dək Braziliyanın Rio-de-Janeyro şəhərində keçiriləcək XXXI Yay Olimpiya Oyunlarına daha bir lisenziya qazanmışlar. Bu  dəfə xoş xəbər Fransadan alınmışdır.

Eqebelet şəhərində təşkil edilmiş akademik qayıqlarda avarçəkmə üzrə Olimpiada-2016-ya lisenziya xarakterli dünya çempionatında Aleksandr Aleksandrov-Boris Yotov dueti fərqlənmişdir. Təmsilçilərimiz Olimpiya oyunlarında iştirak etmək hüququnu ikinəfərlik qayıqda 2000 metr məsafəyə startlarda qazanmışlar.

Bu, Azərbaycan avarçəkənlərin Rio Olimpiadasına artıq dördüncü lisenziyasıdır. Xatırladaq ki, ilk üç olimpiya “biletindən” ikisinə avqustun sonunda İtaliyanın Milan şəhərində keçirilmiş dünya çempionatında baydarkalarda 200 və 500 metr məsafəyə yarışda İnna Osipenko-Rodomska sahib olmuş, daha bir lisenziyaya isə birnəfərlik qayıqda 2000 metr məsafəyə startlarda Valentin Demyanenko sevinmişdi.

Oqtay BAYRAMOV,
“Xalq qəzeti”