"SOCAR Azərbaycan" komandası Bolqarıstanın Plovdiv şəhərində şahmat üzrə klublararası 26-cı Avropa çempionatına inamlı qələbə ilə başlamışdır. Təmsilçilərimiz 49 komandanın mübarizə apardığı və yeddi turdan ibarət yarışın startında Makedoniyanın "Qambit-Asseko-See" klubunu 5,5:0,5 hesabı ilə məğlubiyyətə uğratmışlar.
Bu matçda təkcə birinci taxtada çıxış edən Şəhriyar Məmmədyarov heç-heçə oynamışdır. Qalan taxtalarda Aleksandr Qrişuk, Maksim Vaşye-Laqrav, Rüstəm Qasımcanov, Rauf Məmmədov və Eltac Səfərli "SOCAR"a hərəyə bir xal qazandırmışlar. Qeyd edək ki, hər komandanın heyətinə səkkiz şahmatçı - altı əsas və iki ehtiyat oyunçu daxildir.
Dünən keçirilən ikinci turda Azərbaycan klubu Belçikanın "Eynatten-KSK 47" komandası ilə görüşmüşdür.

Oqtay BAYRAMOV, "Xalq qəzeti"