Bakının qadınlardan ibarət iki komandası "Azərreyl" və "İqtisadçı" Avropa Voleybol Konfederasiyasının "Çelenc" kuboku yarışlarında ilk səddi uğurla dəf edərək növbəti mərhələdə fəxri mükafat uğrunda mübarizəni davam etdirmək hüququ qazanmışdır.
Bir həftə əvvəl Maltada yerli "Paola" klubunu asanlıqla məğlubiyyətə uğradan (3:0) "Azərreyl" evdə cavab görüşündə də heç bir çətinliklə üzləşməyib yenə üç hissədə qələbə qazanmışdır. Voleybolçularımızın növbəti rəqibi Yunanıstanın "Markopulo" komandası olacaq.
"İqtisadçı" isə qarşılıqlı razılığa əsasən Bosniya və Herseqovinanın "Kula" klubu ilə hər iki oyunu Bakıda keçirmişdir. Hakimlər bu görüşlərdə meydan sahiblərinin xeyrinə iki dəfə 3:0 hesabı qeydə almışlar. "İqtisadçı" da ikinci mərhələdə yoluna davam edəcək. Bu mərhələdə bakılıları Avstriya təmsilçisi ilə iki oyun gözləyir.
Kişilərdən ibarət "Azərneft" komandası isə "Çelenc" kuboku turnirində mübarizəni erkən dayandırmalı olmuşdur. Bakılılar "Sərhədçi" İdman Olimpiya Mərkəzində ilk oyunda Serbiyanın "Partizan" (Belqrad) komandasına 0:3 hesabı ilə uduzmuş, ertəsi gün həmin hesabla qalib gəlmiş, lakin əlavə, "qızıl" hissədə məğlub olmuş və növbəti mərhələyə vəsiqəni serblər qazanmışlar.