Sentyabrın 7-də Almaniyanın Ştutqart şəhərində starta çıxacaq bədii gimnastika üzrə dünya çempionatı onun iştirakçıları üçün ikiqat əhəmiyyətə  malik olacaq. Bu növün ən yaxşı ustaları çempionatın medalları  ilə yanaşı Rio-de-Janeyro Olimpiadası — 2016-ya lisenziyalar  uğrunda  mübarizə aparacaqlar.

Bəs Braziliyada XXXI  Yay Olimpiya Oyunlarında iştirak  etmək  hüququ  qazanmaq  üçün Almaniyada  necə nəticə  göstərmək,  hansı yerləri  tutmaq  lazımdır? Bu suala Azərbaycan bədii gimnastlarının  dünya çempionatına səfəri ərəfəsində yığmamızın baş məşqçisi Mariana Vasilevanın azerisport-a müsahibəsindən cavab tapmaq olar.

Məşqçi  müsahibəsində  deyib ki, Ştutqartda şəxsi yarışlarda ölkəmizi  Marina Durunda,  Ayşən Bayramova və  Gülsüm Şəfizadə  təmsil  edəcəklər.  Bu yarışların yekununda  çoxnövçülükdə  ən yaxşı  nəticə göstərən 15 idmançı Rioya lisenziya  qazanacaq. Qrup  hərəkətləri  komandamız isə (Siyana Vasileva, Səbinə Abbasova, Diana Doman, Aynur Mustafayeva  və Aleksandra Platonova)  bu  məqsədə  çatmaq üçün finişdə ən yaxşı  səkkiz kollektiv  sırasında olmalıdır.

Ştutqartda  hansı gimnastların  Rio-de-Janeyroya getmək  arzusunun  həyata  keçəcəyi tezliklə,  cəmi bir həftədən sonra  məlum olacaq.

Oqtay BAYRAMOV,
“Xalq qəzeti”