Fransada keçirilən akademik qayıqlarda avarçəkmə üzrə dünya çempionatının startı Azərbaycan idmançıları üçün uğurlu olub. Aleksandr Aleksandrov və Boris Yotovdan ibarət duetimiz 2000 metr məsafəyə yarışların ilkin mərhələsində inamla çıxış edərək dörddəbir finala çıxıb. Birnəfərlik qayıqda yarışan Cavid Əfəndiyev də dörddəbir finalda mübarizəni davam etdirəcək.

Dünya çempionatı həm də gələn il Braziliyanın Rio-de-Janeyro şəhərində keçiriləcək Olimpiya və Paralimpiya Oyunlarına seçmə xarakteri daşıyır. Paralimpiyaçıların yarışında ölkəmizi Asif Qasımov təmsil edəcək.

Aleksandrov-Yotov dueti dörddəbir final startlarına sentyabrın 3-də çıxacaq. Əfəndiyev  isə dünya çempionatında mübarizəni bu gün davam etdirəcək.

Oqtay BAYRAMOV,
“Xalq qəzeti”