Beynəlxalq Şahmat Federasiyası (FİDE) 2015-ci il sentyabrın 1-nə olan vəziyyətə görə reytinq cədvəlini dərc etdirib.

Azərbaycanlı qrossmeysterlər Teymur Rəcəbovla Şəhriyar Məmmədyarovun avqust ayı ilə müqayisədə cədvəldə mövqeləri dəyişməyib. Rəcəbov (2738) əvvəlkitək 20-ci, Məmmədyarov (2736) isə 22-cidir.

Dünyanın ən yaxşı yüz şahmatçısının siyahısında daha iki təmsilçimiz vardır. Eyni reytinqə (2657) malik Eltac Səfərli və Rauf Məmmədov müvafiq surətdə 92-ci və 94-cü pillələrdə yer almışlar.

Norveçli dünya çempionu Maqnus Karslenin (2853) başçılıq etdiyi siyahıda ilk beşliyə həmçinin keçmiş dünya çempionları hindistanlı Vişvanatan Anand, bolqar Veselin Topalov (hər ikisi 2816), habelə ABŞ təmsilçiləri Hikaru Nakamura (2814) və Fabiano Karuana (2808) daxildirlər.

Oqtay BAYRAMOV,
“Xalq qəzeti”