Tezliklə Bakıda keçiriləcək şahmat üzrə Dünya kuboku turniri (10 sentyabr – 5 oktyabr) ərəfəsində Moskva – Baku.Ru portalında 14-cü dünya çempionu Vladimir Kramniklə  müsahibə yer  almışdır.

Qrossmeyster  müsahibəsində Bakı turniri  haqqında  danışarkən demişdir ki, hamı yarışlarda iştirak etmək üçün  həmişə  Azərbaycana  məmnuniyyətlə gedir. Çünki  şahmatçılar bilirlər ki, yarış  yaxşı, yüksək  səviyyədə  keçəcək.

Kramnik  həmçinin  Dünya kuboku turnirində   iştirak edəcək  Azərbaycan  şahmatının   liderləri  Teymur Rəcəbov  və Şəhriyar Məmmədyarovu “çox təhlükəli”  rəqiblər  kimi  dəyərləndirib.

Əlavə  edək ki,  mükafat fondu 1,6  milyon ABŞ dolları  olan və 128  şahmatçının  mübarizə  aparacağı Dünya kuboku  yarışında ölkəmizi  Rəcəbov  və  Məmmədyarovla yanaşı, daha dörd qrossmeyster Rauf Məmmədov,  Eltac Səfərli, Qədir Hüseynov  və Vasif  Durarbəyli  təmsil  edəcəklər.  Mütəxəssislərin fikrincə, idman  aləmində  böyük  maraqla gözlənilən qarşıdakı  turnir düz bir ildən sonra – 2016-cı ilin sentyabrında paytaxtımızda təşkil olunacaq 42-ci Ümumdünya Şahmat Olimpiadasına  hazırlıq  baxımından yaxşı  məşq olacaq.

Oqtay BAYRAMOV,
“Xalq qəzeti”